Madhya Pradesh ke Agar Malwa jile mein ek dilkhata hadsa hua hai, jahan Nalkheda ke prasiddh Maa Baglamukhi mandir ke paas ek car bhari barish ke chalte ubhre naale mein bah gayi. Is hadse mein ek hi parivar ke 8 log, jinme teen bacche aur do mahilayen shaamil hain, apni jaan gawa baithe.
Reports ke mutabik yeh parivar Odisha ke Bhubaneswar se aaya tha aur Ujjain se ek hired car lekar mandir darshan ke liye nikla tha. Raaste mein 24 ghante ke andar hui 37mm barish ki wajah se ek chhota naala itna ubhar gaya ki gaadi uske tez behav mein fas gayi aur dekhte hi dekhte doob gayi.
Driver ki pehchaan Agar Malwa jile ke Baroda gaon ke rehne wale Arun Goyal ke roop mein hui hai. Local logon ne turant rescue ki koshish ki, lekin tez behav ke chalte kisi ko bhi bachaya nahi ja saka. Sthaniya prashasan ne baad mein sabhi shavon ko naale se bahar nikala.
Is hadse ke baad gaon walon mein gehra aakrosh hai. Locals ka kehna hai ki is naale par kai saalon se pul banane ki maang ki ja rahi thi, lekin prashasan ne kabhi dhyan nahi diya. Ab ek pura parivar khatam ho jaane ke baad log fir se turant bridge banwane ki maang kar rahe hain.
Yeh ghatna ek bar phir se monsoon season mein kaccha rasto aur bina barrier wale naalon ke khatre ko ujagar karti hai. Prashasan ne jaanch ke aadesh de diye hain aur peedit parivar ko muavza dene ki baat kahi ja rahi hai, lekin sawaal wahi hai — kya yeh hadsa taala ja sakta tha?

